特首候選人林鄭月娥嘅競選辦，最近發生一連串「公關災難」，包括林太競選辦嘅官方facebook專頁因為幾日無更新，被網民質疑林太「係咪同網民disconnect咗？」。唔知林太係咪睇到網民留言，噚日facebook就連續出兩個帖，分別分享自己去探精英足球員班，以及探訪前布政司鍾逸傑。林太似乎用行動回應咗網民，但仍繼續被網民留言批評。

特首候選人林鄭月娥1月時曾邀請傳媒參觀佢位於灣仔會展嘅競選辦公室，當時林太嘅工作枱只有小量物件。林太前晚出席選舉論壇時，就提到以前辦公室有好多文件夾。

另外，一個名為「鏡頭以外」嘅fb專頁，前晚發文批評林太競選辦對於傳媒查詢「不聞不問不回應」。林太競選辦公關團隊成員、中電前公關「一姐」麥黃小珍（麥太）噚日就喺傳媒聯絡WhatsApp群組致歉，不過全文都係簡體字，仲將「謹」此道歉錯寫為「仅（僅）」，引起另一個災難。

麥太：有嘢上多啲　冇嘢唔上

講番林太競選辦嘅facebook專頁，麥太都有同Emily解釋被網民質疑「disconnect」一事。麥太話林太當然唔係同網民「disconnect」，本身林太無私人fb，擔心親力親為無時間，到後來競選辦都想聽吓網民意見，就開咗fb，但「小編」休息幾日又被人鬧，麥太認為好多揣測、擔心同指控都係無需要。

麥太又話，據佢了解fb無一個正常節奏去發布消息，無規定幾耐就要出帖更新狀態，「有嘢咪上多啲，冇嘢咪唔上，好自由嘛」。