鄭經翰與網絡電台D100 – 纵览中国-China In Perspective

開台3年，由鄭經翰創辦的網絡電台D100，首次發雙糧給員工，「啲錢都係聽眾捐出嚟，呢度人工唔高，又成日俾人睇死好快執，唔係有共同信念，好難做落去」。創台3年，2萬訂戶、50萬人收聽，大班自言有交代，「網上點擊率唔差，只係聽嘅人多，畀錢嘅人少，連你哋《蘋果》賣開7蚊，網上話收錢都冇人睇，何況不嬲免費聽嘅電台」。誰說老馬收火？一樣一矢中的。 「我唔會緬懷過去，識上台，就要識落台，你有影響力，現實啲講，代表你有利用價值，但唔需要飄飄然，如果唔係，到你有朝一日冇嘞，會覺得好慘」。今時今日的大班，會否因為影響力大不如前而覺得慘，也許只有他自己知道，但自90年代，開拓「烽煙」潮流，在沙士年代被冠以「10點前特首」，甚至被國際媒體評為最具影響力，卻是事實。他自言，從無被美名沖昏頭腦。「所謂嘅10點前特首，係時代產物」。 「CY視民意如無物」 他笑言，是時勢，造就了他這個英雄。「就算唔計咩網絡平台，多咗發聲渠道，自從CY上台，已經好難再出輿論領袖，意見唔同都好，以前政府仲會應酬吓你班人，家視民意、輿論如無物」。開咪講完，政府急急回應，報紙第二日跟進。今時今日，資訊渠道百花齊放，一個下午洗版，晚上已成舊文。梁振英政府領導下的政府又如黑洞，久而久之，耀眼的煙花，統統變了深水炸彈。 「個世界唔同咗，但都要接受，我唔會緬懷過去」。仍然一副硬骨頭。98年事業如日中天時遇襲中8刀，封咪開咪再封咪；由商台轉投dbc，卻爆股權糾紛，臨門被踢出局，他說，看盡人情冷暖，「好多人曾經老友，家肯定做唔番朋友，李國寶夠紳士咁啦，生意喺晒內地就唔同講法；夏佳理我一直好尊重，企喺公義嗰邊，我到家都好尊重，不過你千祈唔好話D100佢有份，咪害死人」。 D100廣播生涯終點站 網台每年的營運開支2,400萬，他自言已將「留畀個仔」的4,000萬，悉數注資，暫時回本無期。「最應該怪我嘅係我個仔，留畀佢嗰筆冇晒，但我點都要留啲棺材本畀自己」。在大國崛起下做獨立媒體，除了面對政治壓力，經濟壓力一樣沉重，大班自言「試過喺dbc俾人跣一鑊」，見過鬼已經怕死，經濟壓力再大都好，「寧願執咗佢」，都不會接受紅色商人入股D100。 「考慮緊轉做社企，集資成立營運基金，真係做唔住，惟有執咗佢，無辦法」。由10點前特首，到網絡電台創辦人，他不諱言，D100是他30年廣播生涯的終點站。「我差一年都70歲啦，呢條路係好難行，我知道好多人唔睇好，你嚟訪問我，可能都係想睇我死得未之嘛」。他自嘲似的大笑。物移星換，98年捱的8刀早已痊癒，「退咗休，可能做吓小生意，開間餐廳咁囉。」大班如是說。