<p style="margin: 0pt;"><span style="font-family: Arial; letter-spacing: 0pt; font-size: 12pt;">政府安排立法會議員於下月19至20日去廣東省視察東江流域，今日會交由立法會內委會討論。立法會噚日有文件顯示，至今有19名議員報名參加今次考察，當中有8人為民主派，連過往不時被內地拒絕入境、並無回鄉證嘅社民連梁國雄（長毛）都榜上有名。長毛就話會跟程序申領回鄉證件，但批唔批就視乎相關部門決定，就算只有一次性質嘅回鄉證都會隨團咁話。</span></p><p style="margin: 0pt;"> </p><p style="margin: 0pt;"><span style="font-family: Arial; letter-spacing: 0pt; font-size: 12pt;">暫19人報名 包括8泛民</span></p><p style="margin: 0pt;"> </p><p style="margin: 0pt;"><span style="font-family: Arial; letter-spacing: 0pt; font-size: 12pt;">立法會發展事務委員會之前曾經討論東江水考察團嘅建議，同意開放畀委員會以外嘅議員參與。今次隨團考察嘅8名民主派議員當中，包括朱凱廸、梁國雄，專業議政派出嘅3人梁繼昌、邵家臻同葉建源，公民黨就有楊岳橋同郭家麒，民主黨就只有曾經提出考察建議嘅黃碧雲一人做代表。</span></p><p style="margin: 0pt;"> </p><p style="margin: 0pt;"><span style="font-family: Arial; letter-spacing: 0pt; font-size: 12pt;">兩日一夜嘅考察團分別會去深圳同惠州，唔單止視察東江流域，又會去睇吓東江水量水質監控中心、深圳水庫等設施，預計每名議員嘅交通同膳宿開支大約3100元，包括100元嘅旅遊保險，又預計有4名秘書處職員隨團。</span></p><p style="margin: 0pt;"> </p><p><span style="font-family: Arial; letter-spacing: 0pt; font-size: 12pt;">雖然中央之前「開綠燈」，向一班傳統泛民中人發放回鄉證，但長毛之前試過隨立法會訪問團返內地，都會被拒入境。長毛唔評估今次能否成功北上，但話會按既定程序申領回鄉證件，唔知部門會批一次過抑或長期證件，但只要有證就點都會返去履行公務喎。</span></p>