亞洲首次港奪2022同運會主辦權 – 纵览中国-China In Perspective

LGBT又勝一仗！香港擊敗美國華盛頓同墨西哥瓜達拉哈拉，奪得2022年同志運動會（Gay Games）主辦權，成為亞洲首個主辦城市，呢次同運會定於11月舉行，涵蓋36種運動項目，包括本港普及運動龍舟、越野跑同跑樓梯，料吸引1.5萬人參賽、4萬觀眾入場，料喺運輸、住宿、餐飲及零售等帶來10億港元經濟收益。 香港早喺3年前設申辦組織，同運會聯盟嘅考察團今年6月亦訪港考察，香港憑世界級基建、越見尊重多元共融及獲亞洲各地支持，打入最後三強，聯盟前晚宣佈香港獲選為主辦城市一刻，13名香港申辦組織成員振臂歡呼，相擁慶祝，喺fb上載「香港勝利」圖像。 同運會1982年喺美國三藩市首次舉辦，每4年一次，係全球最大型嘅LGBT體藝及文化活動，宣揚包容精神，並非同性戀者先能參加。平機會歡迎香港奪同運會主辦權，指係推廣平權好機會；人民力量立會議員陳志全希望藉同運會加強共融，促進性傾向歧視立法。明光社就當然批評活動係宣揚同性戀意識形態大於運動會，唔希望政府向團體租用場地時提供優惠。<h2>11.25同志遊行爭取平權</h2>而香港同志遊行則喺本月25日星期六舉行，下午3時喺維園出發，以中環愛丁堡廣場為終點，公民黨立法會議員郭家麒同藝人茜利妹出任今年「彩虹大使」，議員陳淑莊同楊岳橋會現身遊行「打氣站」。今年主題係「轉風執位，歧視歸西」，發言人Francis話係寄望新政府上場後，落實保障同志獲平權嘅法例同政策，消除社會對同志嘅歧視。大會選取「自由藍」作為主題顏色，寓意同志同性小眾唔使再隱瞞身份，可過平等、自由嘅生活，主題圖案則係「知更鳥」，代表政府要知道係時候回應同志社群嘅訴求，更新平權現況。