林鄭童年一家七口住板間房 – 纵览中国-China In Perspective

「好打得」嘅特首林鄭月娥，以往都好少講自己嘅童年經歷，直到參選特首嗰陣，就出咗本書仔講自己嘅故事。佢噚日就出席商台節目《偶然》做錄音節目，同主持人馬浚偉分享童年時一家七口住灣仔唐樓板間房閣樓嘅往事，仲話細細個已經幫媽媽手穿膠花同剪布頭幫補家計。 幫媽媽穿膠花幫補家計 林太話，住板間房嗰陣，一個單位有4至5戶人、即係約20人同住，因為佢嗰家住閣樓，所以連企都企唔到，讀書要碌架牀當書枱。佢話，成長嘅1960年代普遍居住環境都係咁狹窄，佢住嘅地方已唔算特別惡劣。 林太細個嗰陣，爸爸同祖母都中風，所以媽媽就要出去工作，平時會拎啲手作仔返屋企做，包括穿膠花同剪布頭，佢都會幫手做。外婆就負責照顧佢哋班兄弟姊妹，所以佢同外婆感情好深厚。 佢話，當時嘅醫療、福利同長者服務都唔夠，大家都要靠自己工作，而佢就喺屋企人身上感受到中國人靠自己嘅精神，所以現在制訂政策，都唔希望大家會失去「靠自己」呢種自助精神。