有人同情馮檢基「做人唔好太屈基」成潮語

立法會九龍西議席補選未正式開始，民主派內部已鬥得激烈。民協馮檢基噚日開記者會，雖然話係為大局着想，自願退出唔會做姚松炎嘅Plan B，但政圈網上已熱議，有人唔滿意有自決派用各種方法逼走阿基，連民主黨裏面都有人話替阿基不值，其中民主黨立法會議員尹兆堅喺facebook留言講笑，話最近嘅潮語已經改為「做人唔好太屈基」！ 各黨派簽署民主動力嘅初選協議，講明如果姚松炎被政府DQ，便由初選排第二嘅馮檢基頂上，但近日民主派內部就有唔少聲音想阿基退下，不過泛民內部亦有人批評，如果唔畀阿基選，即係為求達到目的就唔跟協議機制，咁同政府DQ人有咩分別呢。 任建峰批唔跟機制過分 阿基今次自願退出，仍未能化解爭議，除咗有尹兆堅等民主黨人替阿基不值，律師任建峰亦喺網上撰文，話佢唔係馮檢基嘅支持者，但民主派今次「拆初選」唔跟機制係太過分，「說到今次為了自己一時政治盤算而通過各種施壓把初選機制撕破的人士，他們根本就是一鋪過拆掉民主派多年來在重大議題上擁有的道德高地」。 行會成員湯家驊都有話說，佢喺facebook留言話「唉！政治非君子所為，一點沒錯！早有約書、甚麼原則也沒用，『團結』可改寫一切！馮檢基數十年為香港、為民主的付出，原來在利益當頭之今天，竟是一文不值。奈何！」立法會九西已報名參選者有民建聯鄭泳舜及姚松炎。