<p style="margin: 0pt;"><span style="font-family: Arial; letter-spacing: 0pt; font-size: 12pt;">社民連噚日舉行周年會員大會，選出新一屆行政委員會成員，吳文遠連任黨主席，而目前正喺獄中嘅黃浩銘亦成功連任副主席，另一名副主席就由周諾恆擔任。吳文遠話，相信未來嘅日子會非常困難，「但社民連有打不死嘅精神」，指喺政治壓迫下，社民連將會行得更前，亦會協助泛民喺下個月嘅補選中全取4席。</span></p><p style="margin: 0pt;"> </p><p style="margin: 0pt;"><span style="font-family: Arial; letter-spacing: 0pt; font-size: 12pt;">黃浩銘因為2014年佔旺清場期間違反禁制令，早前被裁定刑事藐視法庭罪成，判囚4個半月，現正服刑。雖然阿銘無法出席會員大會，但會員都繼續支持佢做副主席。</span></p><p style="margin: 0pt;"> </p><p style="margin: 0pt;"><span style="font-family: Arial; letter-spacing: 0pt; font-size: 12pt;">吳文遠﹕繼續和平非暴力抗爭</span></p><p style="margin: 0pt;"> </p><p style="margin: 0pt;"><span style="font-family: Arial; letter-spacing: 0pt; font-size: 12pt;">吳文遠話唔會因為政權打壓去改變原則，強調會繼續主張和平非暴力嘅抗爭，去對抗威權管治。佢又話，特首林鄭月娥只係延續梁振英嘅施政，好多香港人都得唔到基本嘅生活保障。</span></p><div> </div><p><span style="font-family: Arial; letter-spacing: 0pt; font-size: 12pt;">「長毛」梁國雄被取消立法會議員資格後，社民連就無咗唯一一個立法會議席，吳文遠話社民連唔係因為立法會議席而存在，強調該黨會繼續透過抗爭達至根本社會改變。佢又話會就長毛被DQ上訴到終審法院。</span></p>