<p style="margin: 0pt;"><span style="font-family: Arial; letter-spacing: 0pt; font-size: 12pt;">立法會4個事務委員會將會喺下月底前往粵港澳大灣區考察，議員會去深圳、東莞、廣州、佛山同中山考察當地嘅創新科技同金融發展等，立法會經濟發展事務委員會主席、經民聯林健鋒（Jeffrey）會擔任團長。本身係佛山南海人嘅Jeffrey話，打算帶埋議員去佛山嘅「嶺南天地」見識吓。</span></p><p style="margin: 0pt;"> </p><p style="margin: 0pt;"><span style="font-family: Arial; letter-spacing: 0pt; font-size: 12pt;">議員倡去華為總部 睇虎門大橋</span></p><p style="margin: 0pt;"> </p><p style="margin: 0pt;"><span style="font-family: Arial; letter-spacing: 0pt; font-size: 12pt;">今次考察係立法會經濟發展事務委員會、資訊科技及廣播事務委員會、工商事務委員會，以及財經事務委員會聯合舉行。一眾議員噚日開會傾行程，建議去深圳參觀華為總部同當地嘅交通監控中心，了解深圳嘅智慧城市管理。考察團亦會去東莞松山湖科技產業園區，仲睇當地基建，如虎門大橋。最後一日會去廣州，喺廣州坐高鐵返港，等議員親身感受吓。</span></p><p style="margin: 0pt;"> </p><p><span style="font-family: Arial; letter-spacing: 0pt; font-size: 12pt;">Jeffrey話，立法會議員對上一次去廣州考察已經係2009年，今次可以睇吓當地變得幾快。議員去到佛山，Jeffrey會盡「地主之誼」，佢會喺其中一晚帶大家「夜蒲」，見識「嶺南天地」。「嶺南天地」係保育活化嘅新綜合商業區，入面有唔少具嶺南特色嘅歷史建築物。Jeffrey估計今次會有約一半嘅議員參加考察團，相信民主派都會有十幾人參加。</span></p>