五一遊行抗議企業肥上瘦下收入差1462倍 – 纵览中国-China In Perspective

香港唔少打工仔收入追唔上通脹，分享唔到企業成果。職工盟比較咗10個大財團高層同基層員工嘅人工，發現最誇張嘅可以相差1462倍。如果基層員工要賺到高層年薪，起碼要由唐朝做到今日先至得。下周二又到五一勞動節，職工盟發起遊行，抗議企業肥上瘦下，希望爭取落實標準工時44小時。職工盟總幹事蒙兆達話，2003年至2017年間，累計名義工資嘅增幅係45.9%，但同期累計通脹有46.6%，實質工資變動係負0.7%，工資表面上加咗，最終畀通脹蠶食晒。蒙兆達分析咗本港10個財團最高人工嘅董事同行政人員嘅年薪，再同基層員工年薪比較，結果發現相差44至1462倍不等，肥上瘦下非常嚴重。其中差距最大係長和集團，聯席董事總經理霍建寧嘅年薪有成2.1億元，而普通百佳超市嘅店務員月薪只係得1.2萬元左右，如要賺到高層年薪，要做1462年，即係由唐朝開始做到今日先得。任職領展保安員嘅余美雲話，自己一直都係攞最低工資，月薪得9100元，領展行政總裁王國龍上年薪金有成5520萬元，佢要做476年先攞到呢個數額。<div> </div>職工盟秘書長李卓人呼籲市民響應遊行，當日下晝兩點喺維園遊行到「公民廣場」。