<p style="margin: 10.5pt 0pt 1.05pt;"><span style="font-family: Arial; letter-spacing: 0pt; font-size: 12pt;">前日係六四29周年，各大泛民政黨同民間團體一如既往喺銅鑼灣同天后一帶擺街站籌款，今年民主派政黨嘅「吸金」能力唔錯，至少都有6位數字。不過，拒絕出席支聯會六四燭光晚會嘅學聯，喺場外開檔為「抗爭者支援基金」籌款，就只係籌到8000多元，遠低於其他團體。有唔少人批評學聯抽水，但學聯重申為基金籌款並非為私利，而係支援抗爭者。</span></p><p style="margin: 10.5pt 0pt 1.05pt;"><span style="font-family: Arial; letter-spacing: 0pt; font-size: 12pt;">支聯籌148萬 唔介意學聯做法</span></p><p style="margin: 10.5pt 0pt 1.05pt;"><span style="font-family: Arial; letter-spacing: 0pt; font-size: 12pt;">學聯喺場外籌款引嚟唔少批評，因為佢哋唔去晚會，但就喺門口籌錢。支聯會秘書李卓人噚日喺商台《在晴朗的一天出發》上話，尊重任何團體籌款，又期望香港人團結。佢話雖然與學聯喺建設民主方面有分歧，但「（學聯）今次幫抗爭者，（我）唔覺得作為大會有意見」。</span></p><p style="margin: 10.5pt 0pt 1.05pt;"><span style="font-family: Arial; letter-spacing: 0pt; font-size: 12pt;">李卓人話，前晚支聯會籌到148萬元，比上年多7萬元，扣除舉辦集會開支等，可以撥50萬元到六四紀念館，惟「以900萬（新館首期）作目標，差百多萬元」。</span></p><div> </div><p><span style="font-family: Arial; letter-spacing: 0pt; font-size: 12pt;">另一邊廂，被市民誤會「逃獄」去擺街站嘅社民連主席吳文遠透露，今年社記籌到32萬元，比去年大增13萬元。吳文遠話市民反應踴躍，可能係因為過去一年社民連面對好多打壓，好多成員先後入獄，所以多咗市民捐錢，「幫我哋頂住」。香港眾志亦籌到33萬元，比去年大升15萬元。</span></p>