七一遊行有「逆行」方案 – 纵览中国-China In Perspective

民陣敲定今年七一遊行主題為「結束一黨專政，拒絕香港淪陷」。民陣召集人葉志衍同Emily講，現在仍然同警方爭持緊遊行嘅起步點，佢透露，除咗喺銅鑼灣東角道起步嘅建議，民陣仲有另一個「逆行」方案，就係由金鐘政府總部東翼前地（俗稱公民廣場）出發，遊行去維園或中聯辦。主題包括「結束一黨專政」剛過去嘅六四29周年悼念晚會，大家都將焦點放喺「結束一黨專政」嘅口號，唔夠一個月內，七一遊行又再叫多次，擔唔擔心市民會覺得悶？葉志衍話，有兩個階段嘅宣傳攻勢，希望可以呼籲市民上街：首階段會以遊行起步點嘅爭議，去引起市民關注七一遊行。喺遊行前兩星期，就會主力宣傳唔同嘅社會議題，例如國歌法同撐粵語等，吸引市民參加遊行。至於點解會有「逆行」方案，葉志衍話「逆行」象徵現時政策倒退，並要表達連遊行起步點都係揀無可揀，要倒轉行嘅不滿。民陣原本計劃喺維園足球場起步，但康文署將場地租咗畀慶委會舉辦慶回歸活動，因此民陣需要另覓起步點。民陣今個星期會再同警方開會，稍後先會拍板最終遊行路線方案。葉志衍現時估計，今年遊行人數會同往年差唔多。去年嘅七一遊行，民陣指有逾6萬人參加，警方就話最高峰時有1.4萬人參加。