<p style="margin: 10.5pt 0pt 1.05pt;"><span style="font-family: Arial; letter-spacing: 0pt; font-size: 12pt;">今年度嘅立法會會期7月中完結，意味民主派會議召集人、專業議政莫乃光將會交棒。召集人呢個位由民主派4個板塊（民主黨、公民黨、專業議政及議會陣線）嘅代表輪流擔任，新一屆會期將由議會陣線代表出任召集人，Emily聽聞毛孟靜（Miss Mo）會接棒。</span></p><p style="margin: 10.5pt 0pt 1.05pt;"><span style="font-family: Arial; letter-spacing: 0pt; font-size: 12pt;">過去兩年，先後由民主黨涂謹申同莫乃光擔任召集人，本來新一屆會期係由公民黨代表做召集人，而該黨都有共識由陳淑莊（Tanya）擔任，但Tanya將要面對佔中案審訊，為免影響召集人工作，新一屆會期先由議會陣線頂上。</span></p><p style="margin: 10.5pt 0pt 1.05pt;"><span style="font-family: Arial; letter-spacing: 0pt; font-size: 12pt;">Miss Mo噚日接受Emily查詢時話：「公民黨唔想做住。」同屬陣線嘅人民力量陳志全推薦佢出任召集人，議會陣線其他成員都無反對，預料Miss Mo將會得到民主派確認，出任召集人。</span></p><p><span style="font-family: Arial; letter-spacing: 0pt; font-size: 12pt;">民主派會議前身叫「泛民飯盒會」，係民主派立法會議員嘅溝通平台。2016年立法會選舉後，唔少人用「非建制派」去將自決派、本土派及民主派議員歸納為一個陣營，令部分民主派議員不滿，認為無法反映多年來爭取民主嘅政治立場，因此當時一眾「非建制派」議員將新成立嘅溝通平台正名為「民主派會議」。</span></p>