許智峯阻區會撥款與陳學鋒雙雙倒地或再惹官非

一向是非多多嘅民主黨立法會議員兼中西區區議員許智峯再次喺區議會發生肢體衝突！今日中西區區議會財務委員會會議上，許智峯為咗阻止撥款通過，擬將區議會副主席、民建聯陳學鋒推跌，二人其後雙雙倒地。許智峯話因為陳學鋒出腳被「kick跌」，陳學鋒則話對方被電話線kick低，仲話考慮報警處理喎。話說今日中西區區議會財務委員會會議原定審議多個撥款，包括由中區街坊福利會申請，涉15萬元嘅一個導賞項目。許智峯話因為財委會主席李志恒嘅外甥女衛珮璇係福利會成員，而衛曾於2011年區議會選舉代表該會參選，覺得有利益衝突，唔應該批出撥款；但許智峯當時被主席禁止發言，於是佢離坐向主席抗議，點知去到陳學鋒個位想繼續推前進發時突跌低，仲同陳學鋒一齊倒地。根據陳學鋒提供嘅片段，許智峯當時係企圖越過陳學鋒走向主席位置，而陳學鋒當時係用緊電話，許智峯之後則用身體靠向陳時，疑失重心向前仆低，連帶陳學鋒亦一齊倒地。可惜短片影唔到兩人下半身，到底發生乜事？無法還原真相，大家自行睇片做評估。而兩人事後對罵，要由其他議員將佢哋分開，最終撥款都係成功通過。許智峯接受八方查詢時解釋，自己唔係有意撞跌陳學鋒，反而指控陳學鋒出腳將佢「kick跌」。至於陳學鋒就話當時自己用緊電話叉電，許智峯係kick倒叉電線而跌低，佢又話雖然無明顯受傷，但會考慮報警備案。