學聯60周年晚宴馮煒光同戴耀廷自拍 – 纵览中国-China In Perspective

香港專上學生聯會（學聯）唔經唔覺已成立60年，多年來參與唔少社會事件，由《基本法》諮詢、起草，到六四事件、佔領運動都可以見到學生身影。學聯噚日舉辦60周年晚宴，唔少老鬼都有出席，呢晚大家都放底分歧，連經常同民主派喺網上開火嘅前新聞統籌專員馮煒光，都同多次畀佢口誅筆伐嘅港大法律學院副教授戴耀廷自拍，仲喺facebook話「今晚不談政治，只是懷舊」。另一張馮煒光同戴耀廷、民主黨張賢登等嘅合照，更搭晒膊頭，狀甚老友，佢哋當年都係基本法諮詢委員會嘅學界代表。學聯噚晚筵開15圍，出席嘅包括前新聞統籌專員何安達、馮煒光；立法會議員區諾軒、葉建源；前議員單仲偕、李永達等。據了解，噚晚晚宴期間唔少人都一再高呼「天滅中共」，馮煒光直言對此百感交集，對於自己係咪場內少數「異見人士」，馮煒光話：「我不是異見，因我是1985年學聯會長。學聯光譜很闊。」區軒叫馮諗吓當年另一被馮煒光集郵嘅，仲有曾為民主黨黨友嘅區諾軒。區軒同Emily講，馮煒光應該好清楚當年作為香港學生代表，點樣思考主權移交前途，但多年後對方加入前特首梁振英陣營成為輿論機器，希望馮見番當年戰友，可以諗番以前條路咁話。區軒話噚晚氣氛好好，雖然對近年院校退聯等事件感可惜，但希望有大專院校升格做大學嘅同時，都會有重新建立平台嘅可能。