臨近農曆新年，唔少政黨都會推出特色產品喺年宵攤位發售，民主黨今年就推出「議事廳狼人」卡牌遊戲，參考「狼人遊戲」畀玩家做角色扮演，估出邊個係暗地操控議事廳嘅「狼人」。<br /><br />除咗一眾高官同建制派，民主黨亦為黨友精心設計遊戲角色，例如將黃碧雲塑造成「貓女」，鄺俊宇變成愛神邱比特，每套卡牌賣88元，民主黨相信可以喺年宵賣晒1000套。<br /><br />民主黨噚日向傳媒介紹呢款遊戲，負責創意媒體工作嘅黎敬瑋話，希望透過遊戲令市民輕鬆接觸政治信息，每張卡牌都印有相關政治人過去嘅言論，喚起市民記憶。遊戲內有30個角色，由黨內同事一手一腳設計，佢話事前已確保唔會出現侵權問題，而由於題材敏感，卡牌係喺香港製造。<br /><br />題材敏感 香港製造<br /><br />民主黨形容，「議事廳狼人」其中一個賣點，就係遊戲角色同現實政治環境互相呼應，4個暗地「操控議事廳」嘅狼人，分別係特首林鄭月娥、前特首梁振英、立法會主席梁君彥同民建聯主席李慧琼。<br /><br />眾志賣二創國歌貼紙卷<br /><br />另邊廂，香港眾志今年會喺年宵攤位發售印有中國國歌改詞嘅貼紙卷，藉此反對《國歌法》立法，眾志形容貼紙卷日後「可能變成違禁品」。<br />