油尖旺大南區因為原任區議員、經民聯莊永燦逝世，本月24日會舉行補選，有兩人參加。民主派噚日舉行集氣大會同社區巡遊，為披甲上陣嘅「社區前進」李國權造勢，有逾百人出席，包括多名民主派立法會議員、區議員等，連2015年參選大南嘅民主黨馮文韜，以及2011年參選該區嘅社民連吳文遠都有出席撐場。吳文遠仲高叫口號，呼籲「食窮經民聯，票投李國權」。<br /><br />會長撐場 社總獻出第一次<br /><br />本身係社工嘅阿權，亦得到香港社會工作者總工會會長倫智偉到場支持。倫智偉明言社總成立39年都未試過支持區議會參選人，形容阿權注重社會公義，有「社工DNA」。<br /><br />阿權評估現時勝算係五十五十，估計投票率起碼都要同上次立法會補選相若，即係逾四成先較有勝算，又話最大隱憂係唔清楚對手經民聯李思敏嘅策略，難以評估對手用咩方法拉票。<br /><br />被取消立法會議員資格嘅劉小麗、羅冠聰、梁國雄同姚松炎噚日亦有到場，近期較少露面嘅姚松炎早前患上眼疾，雖然醫生話佢已經好番，但不時都會復發流眼水。姚教授4年前區選曾經出戰自己所住嘅置富，被問到年底會唔會再出選置富，佢就話嚟緊再開會，睇吓邊個出戰較恰當。<br />