民主黨去年底宣布成立國際事務委員會，加強同國際溝通聯繫，噚日佢哋一行人去見美國駐港總領事唐偉康（Kurt Tong），討論各類港人關心問題。委員會主席劉慧卿同Emily講，數星期前Kurt喺美國會演講，佢聽完之後約對方見吓面。<br /><br />卿姐話，委員會噚日同Kurt大約見咗一個鐘，都係講吓《逃犯條例》修訂建議、佔中案判決等事件，會上向Kurt表達商界、專業人士、非政府組織同記者對於修例都好擔心；同埋佔中案判決4人入獄，會出現寒蟬效應，令大家擔心表達自由。卿姐又話會上都表達咗港人對一國兩制、高度自治受侵蝕嘅憂慮，批評特首林鄭月娥冇代表港人捍衛呢啲價值，反而似僕人，北京要做乜就做乜。至於Kurt點睇，卿姐就拒絕透露。<br /><br />民主黨成立國際事務委員會，希望整合與外國嘅聯繫、加強交流，咁短期內會唔會有外訪計劃？民主黨副主席羅健熙話，今明兩年分別有區議會及立法會選舉，實在太忙，所以估計委員會舉辦大型外訪機會較細；至於個別人士外訪，就要視乎各自日程。<br />