星期日嘅反對修訂《逃犯條例》遊行，主辦方民陣話有13萬人參加，警方話高峰時有2.28萬人；政務司長張建宗當日話遊行人數多寡唔係重點，近日政府亦表明想盡快通過修例。一直反對修例嘅自由黨榮譽主席田北俊（圓圖）就喺facebook度質疑：「政府真係當十三萬人無到㗎喎。」<br /><br />「人數不重要 咁乜嘢重要？」<br /><br />2003年政府推動緊《基本法》23條立法，田少喺七一50萬人大遊行後，突然倒戈反對立法，仲辭任埋行政會議成員。佢噚日喺fb上話係「五十萬人感動咗我」，又問「唔知今次要咩數字，先可以輕輕觸動政府？」佢仲hashtag以下提問：「人數真的不重要？咁乜嘢先重要？香港人仲可以點？」<br /><br />田大少又上載咗張相強調，香港同內地無移交逃犯係用嚟保障港人、「一國兩制」同高度自治，成為香港獲世貿或美國特別貿易優惠嘅理據，唔係政府所講嘅漏洞。睇番今次嘅《逃犯條例》修訂事件，大少嘅細佬田北辰亦建議政府應撤回修例。<br /><br />大少呢個post出咗24個鐘，獲得近4000個like，係近一年佢得到最多like嘅post。公民黨主席梁家傑都有喺fb度轉貼，質問「林鄭月娥，你要幾多香港人上街先會停止將我哋『送中』？！」有網民就留言畀田大少，叫佢促請自由黨黨友到時投反對票，講多無謂。<br />