立法會昨辯論議員對特首林鄭月娥嘅不信任動議，提出修正案嘅議會陣線毛孟靜，早前被指講嘅說話「非議會語言」，再度指摘「林鄭講大話」。佢又話前特首梁振英係「港獨之父」，咁林太就係「焦土之母」，批評佢係偽君子，會「笑笑口、笑住嚟食咗你」咁話。<br /><br />毛孟靜早前喺特首答問大會上於座位高呼「林鄭講大話」，被立法會主席梁君彥以喺座位叫囂為由逐出場，梁其後話「講大話」喺西敏寺係「非議會語言」；噚日主持會議嘅內會主席李慧琼就冇就此評價喇。<br /><br />一眾泛民主派議員為今次不信任動議製作各種道具，新民主同盟范國威（Gary）就整咗示威牌，喺林太肖像下寫住「大話精」；不過展示數分鐘後，梁君彥就以阻住視線為由，要求Gary放低示威牌，結果Gary唯有將牌放低啲，「大話精」字眼就見唔到喇。<br />